Saludo Pader Römer,

Pader ta un ferviente NO den referendem. Pader, nos ta respetá pader. Pero respetá nos tambe. Nos ta gradesidu pa e lucha pa outonomia di doktoor 55 aña pasá. Nos ta komprendé ku pader no ke pa nos pèrdè niun punta di outonomia. Pader ke pa nos keda ku dignidat. Pero ta kua outonomia pader ke men? Ta kua dignidat pader ke men?

Pasobra for di dia nos tin tinu nos ta mira nos gobièrnunan ta lastra abou ta pidi otronan yudansa. Anto pa nan mes falta. Yudansa pasobra a malgastá. Yudansa pasobra nan a fia muchu. Yudansa pasobra tur aña interes ta primi pueblo mas. Ta esei ta outonomia? Ta esei ta dignidat? Ta esei nos mester ‘salbaguardiá’?

Kiko ta e idea di outonomia anto? No ta pa pueblo biba un bida digno? Pader ta haña ku e outonomia ku padernan a bringa p’e 55 aña pasá, a bin resultá den un bida digno pa nos? Nò? Awèl pakiko ta primi e mesun reseta ei dor di nos stròt? Duna nos chèns pa krea nos mes outonomia ku ta pas ku nos tempu. Un outonomia kaminda nos no mester lastra abou mas pidiendo limosna pa sobreviví.

Un outonomia kaminda nos ta haña solushon den un biaha pa gran parti di nos problemanan. I kaminda nos mes ke koperá ku otronan pa kosnan kana mihó ku nan a kana te awor. Pa nos no dependé di otro mas.

E ora ei numa, nos ta outónomo di bèrdè.

Awèl SI!