Esaki Don Martina a bisa na tv

Esaki ta e realidat

“Na 2006 mi a konsehá pa akordá slotverklaring pa na kaminda atendé e puntonan di doló.”

Gobièrnu a sigui e konseho aki al pie de la letra i p’esei ta insólito pa awor bin bèk riba dje. Pa kolmo Kòrsou a gana riba tur i delaster un punto, ku eksepshon di e prokurador general.

“Hulanda ta purba influenshá pueblo pa vota SI.”

Esaki no tin nada di haber si e pakete negosiá ta bon òf malu pa Kòrsou, pues e no ta relevante.

Pa kolmo, Hulanda por ta hasi esaki hustamente pa iritá hende i influenshá hende pa vota NO, pasobra nan tin gana pa pueblo rechasá e pakete. Pasobra Kòrsou a gana Hulanda riba práktikamente tur punto.

Tin hende na Hulanda tambe, manera Brinkman, ku ta purba influenshá pueblo pa vota NO. Pasobra Brinkman sa ku NO por bin resultá finalmente den independensia di Kòrsou.

“E tempu ei Hirsch Ballin a ninga di bai djakuerdo pa laga RvS duna konseho imediato riba aanwijzingsbevoegdheid. Hirsch Ballin ta gemeen.”

E karakter di Hirsch Ballin no tin nada di haber si e pakete ta bon òf malu pa Kòrsou. Entretantu Raad van State a duna su konseho i ‘aanwijzingsbevoegdheid’ ta for di mesa.

Pues esaki tampoko no por ta motibu pa bisa NO.

“Si pueblo bisa no, Hulanda mester sanea nos debenan tòg.”

Si bo bisa no, bo ta rechasá saneamentu di debe tambe, pasobra esaki ta forma parti integral di e pakete.

Bo no por kome bo bolo i alabes ward’é den frishidèr. Ta kos di mucha chikitu.

“Hulanda ta viola derechi humano si e no sania nos debenan.”

No tin nada di haber ku derechinan humano si un otro pais no ke karga e debenan ku abo a kousa na un manera outónomo. No ta nos mes a firma tur desishon, tur chèk?

Bo tin ku karga bo propio responsabilidat. Unda orguyo i dignidat a keda?

“A priminti pa ratifika slotverklaring den un RTC, pasobra e no ta definitivo. No a hasi esaki.”

Inkomprensibel. E pakete ku su adaptashonnan a keda ratifiká durante un RTC.

Ademas mester bin un RTC final ainda. Don Martina no a paga tinu, òf e ke brua tera?

“Pa motibu práktiko mi ta kontra un prokurador general konhunto.”

E parti di prokurador general ta e úniko punto ménos positivo den e pakete.

Pero Don Martina mes ta bisa ku e no ta un punto di prinsipio. Si esaki no funshoná den práktika, semper por buska un otro solushon.

“Mi ta kontra kooperashon intensivo entre kuerponan polisial. Kooperashon ta kontra nos mentalidat.”

Pa ki sorto di hende Don Martina ta mira nos anto? Ta nos mes a inventá e konsepto di "sam" i nos ku nos gusta kumpra kos na baka!

Kooperashon nunka no por ta un motibu pa bisa NO. No pensa semper ku ta nos mester yuda otro. Kòrsou tambe por sufri un sla duru pa kua e mester di yudansa di otro. Ademas, e kooperashon lo nó (!) ta intensivo.

Lo tin kooperashon. Pero esaki ta solamente positivo!

“P’ esei mi ta vota NO.”

Pa motibu di sintimentu i solamente un punto chikitu práktiko, Don Martina ta konsehá pueblo rechasá un pakete ku ta bringa siguransa, i drenta un aventura insigur! Esaki no ta digno di un hende ku antes a funshoná komo Promé Minister.