A splika kaba kon Kòrsou a dil ku diferente parti di e negosashon. Pero pueblo mester sa tambe di kon Kòrsou a hasi asina tantu esfuerso pa yega na un akuerdo ku nos partnernan den Reino.

Na promé lugá pasobra pueblo a skohe pa sigui forma parti di Reino Hulandes. Esei ta pone ku nos mester yega na akuerdo ku tur partner den Reino pa krea nos futuro nobo.

Si pueblo no ker a keda den Reino, e tabatin tur oportunidat den referèndem na 2005 pa skohe pa independensia. Pero gran mayoria di pueblo a skohe pa bira outónomo den Reino Hulandes.

Komo parti di Reino, nos pueblo ta siudadano di un teritorio hopi mas grandi. Un teritorio ku su base den Karibe i ku su alanan te den Europa. Esei ta duna pueblo hopi mas posibilidat i seguridat.

Komo mandatario, nos no tin e derecho pa pone esei na peliger, si tin otro manera pa realisá e deseo di pueblo. P’esei a negoshá duru pa salbaguardiá outonomia, pero semper ku e mira pa yega na un resultado positivo. Asina ta logra un komienso fuerte di nos pais nobo, ku posibilidatnan pa nos pueblo den nos mes pais.