Awor ku nos sa kon bini supervishon finansiero a drenta e trayekto estatal, ban mira kiko e ta kome i bebe.

Supervishon ke men ku tin un instansha ku ta kontrolá pa kos kana bon riba sierto tereno. Si kos no ta kana bon, e instansha ta raportá esei na un instansha mas haltu, òf e mes ta intervení pa drecha e situashon. Ta dependé kon a regla un ke otro. Kòrsou a regl’é di tal forma ku e kolegio di supervishon ta kontrolá so.

• E no ta mishi ku niun tarea di gobièrnu.
• E no ta mishi ku niun tarea di parlamento.
• E no ta mishi ku niun tarea di niun instituto demokrátiko di nos pais. Nos mes Raad van Advies ta sigurá esaki.

Loke sí e kolegio ta hasi, ta hala atenshon di gobièrnu di Kòrsou si gobièrnu gasta mas plaka ku e ta risibí. Den un kaso asina, gobièrnu mes ta korihí e situashon. Solamente si gobièrnu no hasi kaso i parlamento tampoko no hasi kaso, e ora ei numa e kolegio ta raportá na gobièrnu di Reino i esaki por aktua si mester.

saki ta pas den e lei mayó ku yama Statüt. Statüt ta regla e relashon entre e paisnan den Reino. Statüt ya kaba ta duna gobièrnu di reino e tarea pa garantisá bon gobernashon. Finalmente, ta Reino Hulandes tin ku garantisá ku e kosnan ei ta kana bon serka nos.

Ke men supervishon finansiero no ta kita nada fo’i pueblo. Al kontrario! Supervishon t’ei pa protehá pueblo kontra mal gobernashon.