Hopi hende ta puntra: Pakiko nos trayekto estatal ta mará na supervishon finansiero? E kontesta ta mashá kla. Pasobra tur isla i tur partido tabata ke esei.
Djis despues ku pueblo a skohe su struktura estatal na 2005, tabatin un Konferensia di Mesa Rondo. Esei ta e reunion mas haltu den Reino, na kua tur pais i tur isla den Reino ta partisipá komo partner igual.

Den e Konferensia ei, na novèmber 2005, tur isla di Antia, huntu ku Hulanda i Aruba a disidí ku:

• nos debenan ta stroba un futuro nobo riba un base salú,
• mester kuminsá e pais nobo ku un situashon finansiero salú,
• Hulanda mester yuda solushoná e problema di debe,
• i mester bini un forma di supervishon/kòntròl finansiero pa sigurá ku nunka mas no ta krea debe asina grandi den futuro.

Algun luna despues, na janüari 2006, tur partido polítiko ku tabata den Konseho Insular di Kòrsou e tempu ei, a ratifiká e desishon ei. Ke men, tur partido huntu a pidi Hulanda pa yuda nos sanea nos debenan. I tur huntu a bai di akuerdo pa mara esaki na supervishon/kòntròl finansiero. Ei supervishon finansiero a nase.

Entre tantu Hulanda a kumpli ku su parti kaba i a pasa plaka riba kuenta di nos Banko Sentral, pa kuminsá sanea nos finansa.