Grupo-Nò ta bisa ku Kòrsou no tin nodi di tuma un parti di debe di Antia Hulandes. Esei ta korekto?
Esei no ta korekto. Si Kòrsou no tuma parti di e debenan di Antia, e ora ei Kòrsou no por tuma parti di e bienes di Antia tampoko. Antia no tin debe so. Antia tin bienes tambe, por ehèmpel edifisio, tereno, akshon den kompania di gobièrnu manera UTS, i tambe partisipashon den instanshanan manera Fondo di Penshun (APNA), Banko di Seguro Sosial (SVB) i Banko Sentral. Awor ku tur isla ta sali for di Antia, e islanan huntu ku Antia mester fiha balor di tur bienes i tur debe pa parti nan.

Grupo-Nò ta bisa ku si nos bende Isla, nos ta por paga tur nos debe i sali for di tur problema. Esei ta bèrdat?
Esei no ta bèrdat.  Nos debe ta un buraku hundu. Te na unda mes nos por paga tur e debe ku benta di Isla, tur e plaka ta bai den e buraku. Lo bo no por kobra hür mas komo doño di e refineria. Ke men bo ta tapa un buraku akibanda, krea otro buraku ayabanda. I pa kolmo bo ta pèrdè e teritorio di mas mihó na Kòrsou, situá den barika di nos haf.
Figurabu: Nós generashon a krea un buraku hundu di debe. I na lugá di laga Hulanda tuma nos debe, nos generashon ta bende e patrimonio di mas grandi di nos pais, pa tapa e buraku kuné. Esei lo ta un krueldat kontra nos yunan.

Grupo-Nò ta bisa ku hende lo sigui invertí i lanta negoshi tòg na Kòrsou, maske nos vota Nò. Esei ta bèrdat?
Pensabo bon. Abo lo invertí na Kòrsou si pueblo no tin moda di gasta? Bo ta tuma riesgo pa lanta un negoshi solamente si bo tin e konfiansa ku e negoshi ta duna fruta. Si Kòrsou vota NO, gobièrnu di Kòrsou nó ta haña un solushon kla i definitivo pa su debenan. E ora ei gobièrnu lo mester tuma medidanan hopi pisá pa e por paga tur su debenan bèk. Medida ke men ku – di un òf otro forma - gobièrnu ta kita mas sèn for di pueblo pa e mes haña mas. Por ehèmpel, gobièrnu ta kobra mas OB òf e ta kobra mas pa su sèrvisionan. E ora ei pueblo ta sobra ménos pa gasta i negoshinan ta pèrdè plaka. Abo lo no tribi di lanta negoshi den un situashon asina. Ni otro hende tampoko.

Grupo-Nò ta bisa ku pueblo no ta gana nada ku e debe ku Hulanda ta paga, pasobra ta bankonan so ta haña tur sèn. Esei ta bèrdat?
Esei ta un mentira grandi. Pueblo TA benefisiá di solushon di debe. Kòrsou debe institutonan manera nos fondo di penshun, nos banko di seguro sosial, bankonan komersial i otronan. Si Hulanda kana parti un saku di plaka entre pueblo di Kòrsou, e problema ta keda eksistí. P’esei Hulanda ta pone e plaka disponibel pa gobièrnu paga tur e institutonan i personanan ku gobièrnu debe. E ora ei gobièrnu no mester usa plaka di pueblo mas pa paga debe. Plaka di pueblo ta keda e ora ei pa benefisionan di pueblo mes, manera skol, kas, kaminda, salú públiko, kuido sosial, etc.

Grupo-NO ta bisa ku si bo ta duda, mihó bo vota NO ya tur kos ta keda meskos ku e ta awor. Esei ta bèrdat?
Apsolutamente ku nò. Nada no ta keda meskos.  No por para e trayekto estatal. E trein ei ta kore kaba. Un voto pa NO ta isolá Kòrsou for di e otro islanan ku sí ta sigui nan trayekto estatal. Tur loke Kòrsou a gana durante tres aña di negosashon, ta bai pèrdí.  Kòrsou lo mester negoshá – e so pará – ku partidonan Hulandes ku ke saka Kòrsou for di Reino. Esei por hasi e klima di negosashon asina malu, ku no ta keda otro kaminda ku bira independiente.

P’esei un voto pa NO ke men ku pueblo por hañ’é ku un independensia ku e no a pidi p’e. Meskos ku a pasa ku e pueblo di Surnam.