Nan ta bisa ku Aruba su Status Aparte ta mihó. Ku Kòrsou ta keda mará na e otro islanan. Esei ta bèrdat?
Nò. Pakiko ora Aruba traha huntu ku e otro islanan, nan no ta bisa ku Aruba ta mará na e otro islanan?

Despues ku Aruba a haña su Status Aparte, Aruba a sigui traha ku nos riba entre otro:

• Korte Komun di Hustisia
• Diferente lei sivil i penal
• Tereno marítimo i di aviashon
• Instanshanan manera G.O.G. i Klínika Capriles
• Fondo di solidaridat, pa yuda e islanan chikitu.

Tòg Grupo-NO ta gaba e outonomia di Aruba mashá. Pakiko ora Kòrsou traha huntu riba algun tereno, e ora ei sí nan ta grita ku Kòrsou ta djis un Antia restrukturá?

Nan ta bisa ku Aruba tin mas outonomia ku Kòrsou. Esei ta bèrdat?
Kòrsou tin un mihó dil ku Aruba.

Pais Kòrsou mes lo nombra su mes hefe di polis. Na Aruba nan por nombra hefe di polis solamente en konsulta ku Hulanda.
Na Kòrsou nos mes minister di hustisia ta atendé asuntu di estranheronan. Na Aruba nan a kita e outoridat ei for di nan minister di hustisia, bou di preshon di Hulanda, i a pon’é den man di minister di salú.

Na Kòrsou nos mes ta fiha nos mes maneho finansiero. Aruba mester raportá periódikamente na gobièrnu di Reino enkuanto su maneho finansiero.
Kòrsou ta haña 3000 mion florin pa kuminsá ku un pais nobo salú. Aruba no a haña niun sèn chikitu.