Ta Hulanda ta bin kontrolá nos finansas?
Nò. No ta Hulanda ta bin kontrolá nos finansas. Ta un komishon di 6 miembro, di kua 4 ta nos mes hendenan (Antiano) i 2 ta di Hulanda. E komishon no ta fiha su mes reglanan. E komishon ta djis kontrolá si nos mandatarionan ta kumpli ku nos propio reglanan di presupuesto. E komishon no ta fiha tampoko kon nos gobièrnu mester gasta su sèn. E úniko kos ku e ta hasi ta: kontrolá pa nos mandatario no gasta mas plaka ku Kòrsou ta produsí. Ku otro palabra: e komishon ta protehá pueblo kontra mal maneho.

Ta bèrdat ku Makambanan ta bin manda?
Al kontrario. Si nos vota SI, porfin lo tin porvenir atrobe na Kòrsou pa nos yunan ku ta studia afó. Pasobra porfin mandatarionan por stòp di maha ku struktura estatal i traha pa Kòrsou. E trankilidat ei, i prinsipalmente e solushon pa debe, ta pone ku ta bini mas invershon i mas trabou. Ora nos mes hendenan por bin biba i traha na Kòrsou, nos ta dependé ménos di otronan ku ta bini algun aña pa hasi e trabou.

Bèrdat Hulanda ta stroba nos desaroyo?
Si esei tabata bèrdat, kon bini anto nos pueblo tin e mihó benefisionan sosial den henter Karibe i Latino-Amerika? B’a yega di tende nunka ku nos hendenan ta bai biba na un otro isla den Karibe pa buska un mihó futuro? Probablemente nò. Pero hopi aña kaba miles di hende ta bini for di otro isla i pais den nos region, pa buska un mihó futuro na Kòrsou. Pasobra Kòrsou tin mihó benefisio sosial i mas chèns pa traha bai dilanti. Ke men, hende ku bisa ku makamba a stroba desaroyo di nos pueblo, ta gaña ku e úniko meta pa instigá hende kontra hende.

Bèrdat Makambanan ta kumpra tur nos propiedat?
Si estranheronan ta kumpra nos propiedatnan, ta pasobra nos mes ta bend’é. I ta nos mes ta traha, respetá òf violá nos leinan ku ta regla kua parti di Kòrsou por usa pa kua meta. Nada di esei no tin keber ku referèndem, ni SI, ni NO.