Opinion: dikon ami lo vota Si i no vota No!

Dikon SI:

Pais Antia lo stop di eksisti. Korsou ta bira un Pais autonomo den Reino . Nos por desaroja nos mes maneho riba diferente tereno.
Un solo kapa di gobernashon, ta nifika menos mandatario / parlamentario i menos gastu ku awor aki. Finalmente esaki mester kondusi na un aparato di gobiernu mas efisiente. Otro islanan ku por okupa posishon di jabi no por stroba kontinuidat di nos gobernashon.
Pago di e debe nashonal interno ta ankra den lei (70% di nos debe ta wordu paga sin obligashon pa paga bek) basta nos no surpasa e norma di interes i nos presenta un presupuesto balansa. E pago di majoria di e debe ta krea espasio finansiero pa inverti den por ehempel nos suidadanonan ku menos rekurso, grandinan, ensejansa , salubridat i kombatimentu di kriminalidat.
Supervishon finansiero pa 5 aña ta akseptabel. Un gobiernu responsabel nunka por duna sen sin pone ningun kondishon. Nos gobernante i parlamentarionan a proba den e ultimo desenianan ku no semper nan a atende responsablemente ku nos presupuesto. Tampoko nan a eherse nan obligashon pa kontrola gastu na un manera adekua. Un organo independiente, ku de fakto ta konsisti den nan majoria pa nos mes profeshonalnan, ku ta eherse supervishon si nos ta tene nos mes na normanan ku nos mes a stipula ta para garantia pa un supervishon finansiero responsabel. Ta na nos Gobiernu i nos propio Parlamento pa presenta presupuestonan realistiko i balansa i no surpasa e norma di interes ku nos mes a stipula. Si nan kumpli ku esaki de fakto Kolegio di Supervishon Finansiero no tin nada di hasi.
Outoridat pa fia di pais Korsou (te ku e Norma di interes) i no 100% saneamentu di debe ta un eskoho konsientemente hasi i ku ta al kaso. Pasombra e ta un instrumento importante den desarojo ekonomiko di nos Pais ku nos no mag perde.
E pakete di SI ta evita un debakel finansiero, deskontinuidat i un posibel fait pa Korsou.
E chance pa alto supervishon obligatorio of kuratela ta wordu evita.
Rating/ Klasifikashon, Klima di invershon i e Posishon finansiero di salida di Pais Korsou ta wordu mehorá konsiderablemente.
Tur entrada di belasten genera na Korsou ta bai pa finansia nesesidatnan di nos mes pais. Korsou por introdusi un sistema di belasten mas simpel i efisiente (menos belasten direkto i mas indirekto) meskos ku ta bai sosode na e Islanan BES.
Un Korte komun di hustisia i di apelashon independiente ta hopi importante pa tur suidadano di nos pais.
Korsou ta haña su propio kuerpo polisial ku por konta tambe ku sosten profeshonal di e otro kuerponan mas speshalisa den Reino. Di e moda aki persekushon, kombatimentu di terorismo i kriminalidat ku ta surpasá frontera ta miho garantisa i struktura.
Un prokurado general pa tur e islanan no ta forma un obstakulo. Su tarea prinsipal ta mantenshon di ley i persekushon di aktonan kriminal. E suidadano komun ku ta obedese nos leinan no ta wordu stroba den nada.
Un ley riba bon gobernashon ta obliga nos mandatarionan i palamentarionan pa aktua di un forma transparente pasombra nan ta responsabel pa nan aktonan i nan por wordu keha!

Puntonan di kritika:

Lamentabel ku den nos konstitushon no a inklui ku ora un politiko wordu sentensia pa un akto kastigabel of di korupshon e no por eherse su derecho pasivo di vota temporalmente.
Lamentabel ku no a introdusi un profiel minimo pa mandatarionan (Ministronan i Parlamentarionan).
Lamentabel ku e sistema di koalishon no a wordu aboli i no a introdusi un sistema pa skohe un Ministro Presidente direktamente ku por nombra su mes Gabinete profeshonal.
Lamentabel ku e prinsipio ku esun ku haña mas voto den un elekshon ta wordu skohe no importa riba ki puesto riba e lista e ta aparese.
Lamentabel ku no a maksima e kantidat di Minister i Parlamentarionan na respektivamente 7 i 15. Si a hasi esaki e kiesdeler lo a subi i e problema di partidonan chiki ku hopi bia ta haña posishon di jabi ta keda elimina pasombra nan lo mester haña mas voto pa kada asiento.
Un prokurado General ku ta raporta na tres Minister por hañe den praktika ku problema. Pero esaki no ta sufisiente motibu pa rechasa e pakete aktual.

Dikon no No:

E “business plan” ku awor a keda presenta ta konfiabel? Esun anterior a resulta di no ta. Un di e ponenshanan ta ku no mester asepta e debe di pais Antia i por bende nos propiedatnan (ISLA, Curoil, Aqualectra, Dok etc). A demostra ku e opshon aki ta un miho alternativa? Kuantu e propiedatnan aki ta bal en realidat? Nos por kore e riesgo aki den un pais ku tin un debe interno di kasi 100% di nos produkto nashonal Bruto? Un pais ku gobiernunan instabil i un poblashon ku tin hopi nesesidat? Kon e optantenan di No ta pensa di atende e nesesidat di likides i e pago di e debenan di korto i largu plaso?
Esnan di No ta propaga ku Pais Korsou lo keda ku debe atras. Si, 30% di e debe lo keda pa nos mes paga. Konsientemente a skohe pa no tuma pago di e debe kompletu pasombra esaki lo a nifika ku pais Korsou lo a perde su outoridat pa fia. Esaki lo difikulta un maneho Makro Ekonomiko den futuro. 70% di e debe si ta wordu paga!
Esnan di No ta propaga ku Hulanda lo tuma poder den nos pais. Korsou ta mantene su mes gobiernu demokratikamente skohe, su mes parlamento i su mes organonan di kontrol manera Algemene Rekenkamer, SOAB, Inspekshon di Impuesto, Korte Komun di Hustisia, Ministerio Publikop i su mes aparato Hudisial. Di unda e dominio di Hulanda ta sali anto?
Por proba ku nos ta entrega autonomia di berde? Statut no ta kambia riba puntonan esenshal!
Leynan Hulandes ta wordu impone riba korsou. Korsou ta dispone ja pa hopi aña di su propio Kodiko Sivil, Penal, Persekushon, Komersio, Ley riba Hustisia, Ley riba Atmishon i Deportashon ets. De fakto ta nos propio parlamentu a aproba e leynan aki. Di unda ta sali ku Hulanda lo impone su leynan riba nos? Un ta nos mes ta responsabel pa esaki?
E promotornan di No ta pretende ku nan por negosha miho ku nos profeshonalnan ku durante 4 aña a negosha ku Politikonan Hulandes. Kua di e promotornan di No aki a demonstra den praktika ku nan si por negosha miho? A base di kiko nan ta kere ku den e klima politiko aktual (drechista i krisis ekonomiko) na Hulanda nan si lo por jega na un miho resultado?
Kon e promotornan di No ta pensa di evita un debakel finansiero si nan gana? Kon nan ta pensa di garantisa kontinuidat di nos Pais i bienestar pa nos pueblo?
E promotornan di No ta sugeri ku nan por hiba Hulanda dilanti di Korte Internashonal of Nashonan Uni? E pakete ku a wordu negosha un ta nos nmes gobiernu a negoshe i nos parlamentu a asepte? A base di kiko nan ta kere ku nan lo tin un chance di gana?

Ta absurdo i na mi opinion iresponsabel pa skohe un opshon ku no ta bon fundamenta. Un opshon No lo trese kontinuidat i stabilidat di nos pais na peliger. Nos por permiti nos mes e “luho” aki?

Ami en todo kaso lo sigui informa mi mes bon i lo basa mi eskoho riba informashon, hechos i resultadonan tangibel.

Nos Pais i nos yunan merese un Gobernashon bon i responsabel. Opshon No no ta sufisientemente konkreto i no ta duna perspektiva sufisiente. Kon nos por deposita, ku un kurason trankil, nos konfiansa den e optantenan di un opshon asina? Ami sigur no por!

Rafael S. Pichardo. Un suidadano kritiko, konsiente i informa.
Kòrsou, 5 di Mei 2009