Un tendensia nobo den e proseso promé ku referèndem ta ku un kantidat kresiente di hoben yu di tata (eks-)polítiko, ta splika públikamente dikon nos tur tin ku vota SI!.

E biaha aki ta toka na Fidel Nita, yu di e defuntu Amador Nita, pilá di e movementu 30 di mei 1969.

Den un grabashon di video ku Awèl SI! a haña riba YouTube, señor Nita ta rekomendá na un manera hopi trankil i klaritu, dikon tin ku vota pa SI!

Tekstualmente señor Nita ta bisa lo siguiente riba e video:

"Lagami papia, lagami splika dikon mi a kambia mi voto. . .

• Mi ta vota SI! pasombra "aanwijzingbevoegdheid" ta for di mesa.

• Mi ta vota SI! pasombra 300 mion florin lo keda den kaha di gobièrnu k'e yudansa finansiero.

• Mi ta vota SI! pasombra un instrumentu di kontrol lo wòrdu implementá pa yuda nos gobernantenan yega na un presupuesto balansá.

• Mi ta vota SI! pasombra e liderazgo di "Nò" ta sigui fomentá konfushon, manipulashon ku informashon, i divishon.

• Mi ta vota SI! pasombra e liderazgo di "Nò" no tin alternativa i e sòm ku nan ke bin kuné lo stanka nos ekonomia pa años i trese un futuro di miseria.

Ta p'esei, dia 15 di mei benidero, desidido i ku konvikshon lo mi vota SI!.

• SI!: pa nos outonomia

• SI!:  pa e pakete di benefisio ku lo trese un futuro sano i stabil pa un Kòrsou outónomo den reino.

Mi number ta Fidel Martí Nita i mu ta aprobá e propaganda aki.
Danki."

Klek riba e imagen akibou pa bo tambe mira e video.