Mi ta un independentista ku nunka a skonde su konvikshon, ni a sinti miedu o berguensa pa ekspresá esaki públikamente. Na mi manera, mi a dediká mi bida produktivo i intelektual den añanan '70 i '80 pa realisá entre otro un "Antia Uní, Liber i Independiente."

Mi ta suponé ku méskos ku ami tin hopi otro hende ku ta anhelá pa djabièrnè dia 15 di mei, shet'or di anochi yega pa kaba, pa nos por bòltu e blachi di un kampaña ku ya kaba for di e Akuerdo di Spaanse Hof di dia 3 di novèmber 2006 a haña tinta di un guera di akto i palabra amargá. Na final, méskos ku tur otro guera kaminda sa glorifiká violensia, loke ta keda pa historia ta e pregunta si propósito dje guera tabata bal un prèis asina desproporshonal.

Hasiendo uzo di un di mi derechonan polítiko atkirí, ku bida i salú, ami lo drenta urna elektoral djabièrnè pa vota den un elekshon liber, sekreto i demokrátiko. Na mi huisio ta trata'kí di un di e elekshonnan kaminda un biaha mas mi voto ta determinante pa destino di mi pais.

Ku un kurason trankil i un konsenshi limpi, AMI lo primi e botón di SI, anto ku kabes na laira.

Ami ta vota Si pasobra mi ta praktiká e refran "di pueblo pa pueblo solidaridat" tantu paden komo pafó di fronteranan di mi isla.

Ami ta vota SI pasobra mi ta un demókrata real i di konvikshon, ku ta biba konforme e promé mandamentu di demokrásia ku ta dikta ku mi mester respetá desishon di mayoria.

Ami ta vota SI pasobra por lo pronto i un biaha mas, mas ku 95% di pueblo a rechasá e opshon 'independensha'. Promé bes tabata diesseis aña pasá na referèndem 1993 i e di dos biaha na referèndem 2005. Si mi konta resultado di e deliberashonnan polítiko for di aña 1973 te na e Konferensha di Mesa Rondó di dianan 7-12 mart 1983 aserka, por papia asta di tres oportunidat kaminda a rechasá e opshon independensha.

Ami ta vota Si pasobra ku e mésun pas ku mi a aseptá mi derota komo independentista, mi a tuma nota di e pakete ku a negoshá pa pone Pais Kòrsou riba pia den Reino.

Ami ta vota SI trankil, pasobra ku mi voto mi no ta regla kuenta ku ningun mandatario, ni ku ningun partido, grupo o movementu polítiko. Esei mi ta laga pa e promé elekshon di Pais Kòrsou.

Ami ta vota SI pasobra ku mi voto mi por bòltu e blachi i porfin hasi Kòrsou un país ku ún gobièrnu, ku ún elekshon kada kuater aña, ún parlamentu, ún nivel di servisio públiko i ku un alivio grandi riba su presupuesto, loke ta hasi posibel pa kumpli na drechi ku e nesesidatnan básiko di esnan mas marginá, i di esnan dependiente di pago, supsidio i asistensia di gobièrnu.

Ami ta vota SI pa un pakete ku ta enserá derecho i debernan finansiero, polítiko i hurídiko ku tur parti di Reino na nan manera mester kumpli kuné, inkluso kada un di e 12 provinsianan ku ta forma e pais Hulanda i ku ta gosa di ménos outonomia den Reino ku nos.

Ami ta vota SI pasobra mi tin konfiansa ku e pakete ku a pone nos dilanti, por hiba nos den un direkshon kaminda riba e suela akí no tin lugá pa inhustisia i persiguishon hudisial parotín, ni lugá pa kriminalidat pisá ku ta krusa tur frontera, ni pa gueranan sangriente entre imperionan di droga i di arma, ni lugá pa trafikashon humano, ni p'e sklabitut deshumanisante di hende muhé, mucha i migrantenan indokumentá, ni pa patronahe polítiko i desperdísio di fondonan públiko.

T'esei ta e Pais Kòrsou ku AMI ke.

Ami ta vota SI trankil trankil, ni maske mi sa ku mester drecha mas kos den e relashonnan di poder den Reino. P'esei mi ta aploudí ku nos parlamento a tuma e inisiativa pa porfin instalá un komishon tripartit pa skrutiná loke yama e défisit demokrátiko entre partnernan di Reino. E komishon ei ya a kuminsá ku su trabou. Pasobra ta hende ta traha lei i ta hende mester kambia lei!

Por último i ni maske kon e resultado di djabièrnè anochi ta, mi ke manda un palabra di apresio pa tur esnan ku a hasi nan esfuerso pa diseñá, negoshá, splika i defendé loke tin riba mesa, pa porfin pueblo di Kòrsou por habri porta i kana drenta sú i mí Pais Kòrsou Nobo.

Una bes den e kas nobo akí, nos tin 5 aña nos dilanti pa wak kon kos bon por bira mihó.

Atentamente, Gladys do Rego - Kuster
Kòrsou, 11 di mei  2009