Marcos Cova, direktor di Indel, ta enfátikamente pro SI!
“Den negosiashon rara bes bo ta haña tur lokual bo pidi, sin duna e otro partido nada a kambio. E pakete total ku a negoshá ta dunami konfiansa den un futuro positivo, kaminda opshon NO ta parse e kaminda pa un abismo”.

Mirando e pakete ku a negoshá, desaroyo ekonómiko internashonal (tambe na Ulanda) i partikularmente desaroyo polítiko na Ulanda, Marcos Cova ta konvensí ku Kòrsou lo no por yega na un dil mihó ku esun aktual.

“Pa’mi ‘status 100% igual ku Aruba’ no ta un meta riba su mes. Sí ta importante un status outónomo ku kondishonnan hustu, ku ta permití desaroyo di nos pais, nos ekonomia i nos kultura, semper protehando nos pueblo.

Supervishon finansiero i hudisial ta instrumentonan importante i nesesario pa yuda protehá nos pueblo. Kumpliendo ku e normanan kumbiní, di mes e supervishon ta bira opsoleto.

Preokupashon lo tei partikularmente serka esnan ku no tin intenshon di kumpli.”
“ Mi no ta sinti ku ni nos outoridat ni nos dignidat ta wordu afektá ku areglonan ankrá den Rijkswet (korda ku nos statüt tambe ta un Rijkswet), ni mi no tin problema pa sera areglo ku e otro isla(nan) (St. Maarten of BES).”

“ Pa vota NO i entregá e dil ku nos tin awor, sea e dil aki mester ta inaseptabel òf  chèns pa un mihó dil mester ta hopi grandi. Ami no ta dispuesto pa gamble ku porvenir i futuro di nos dushi Kòrsou pa nos no pèrdè saku, pèrdè kangreu…

P’esei dia 15 di mei awor na referèndem ami ta vota SI.”